মুখ্য পৃষ্ঠা
06/04/2514:59
"জীৱনৰ প্ৰাপ্তি"
চকুৰ চাৱঁনি যদি বুজি পোৱা তুমি
থৰ হৈ চাব পাৰা সাগৰৰ চকুলৈ
আকাশক নুসুধিবা নীলা বোৰ কাৰ বাবে
কাৰ বাবে ৰাখে তৰা বোৰ বুকুত লৈ |
বগাব পাৰা যদি হিমালয় তুমি
বগাই যোৱা জীৱনৰো পাহাৰ
কাঞ্চনজংঘাক নক'বা কিমান দুখ আছে
থাকক জীৱনত দুখ আশা নিৰাশাৰ |
পাৰা যদি চিঙিব কাঁইটিয়া গোলাপ
চিঙি দিয়া তেনে দুৰ্বলতাৰ শিকলী
কুলিক নুসুধিবা কিয় ইমান ক'লা
বসন্তৰ লগত আছে তাৰ সম্বন্ধৰ
এনাজৰি |
দেখিচা যদি ৰাঙলী হৃদয় তুমি
নোবোৱাবা তেনে তেজৰ নৈ
বিৰহৰ ভাষা বুকুতে ৰাখা
মৰমৰ নিজৰা থাকিব বৈ |
হয় যদি হঠাতে পৰাজয় এদিন
নাযাবা ভাগৰি জীৱনৰ ৰণত
থাকক থাকিলে সুখ সীমনাৰ শেষত
স্বৰ্গসুখ থাকে মাথো মানুহৰ মনত |
© ৰাজু কলিতা
04/01/15
